… Bahereko bitwe ibiti byo gukiranuka byatewe n’UWITEKA ngo bimuheshe icyubahiro.
Yesaya 61:3
Wari witegereza ahantu uri uyu munsi n’aho wifuza kuba ugeze maze ukumva urashobewe? Njye bijya bimbaho. Dupanga gahunda zacu. Dushyiraho ibyo twifuza kugeraho. Duhitamo ahantu runaka twishimira. Ariko birangira umugambi w’Imana ari wo uhamye. Imenya iherezo ibintu bigitangira kandi akenshi mu bwenge bwayo idutera mu busitani twe tutihitiyemo.
Iyo ibyo bibaye, tuba dufite amahitamo y’uburyo bubiri, kuniha no gutaka no kugerageza kurandura imizi yacu cyangwa se guhitamo gushishira aho twatewe, tukera. Iki cya nyuma ni cyo cyiza, ariko si cyo kintu cyoroha buri gihe kuba ari cyo twahitamo. Nyamara guca bugufi mu biganza by’Imana, buri gihe byera imbuto nziza, kandi izi mbuto zigahesha icyubahiro uwaduteye muri bwa butaka.
Iyi mvugo, ‘Shishira mu butaka Yaguteyemo’ yitiriwe Mutagatifu Francis wa Sales (Umushumba w’i Geneve wo mu myaka 1567-1622). Yabyanditse ari mu busitani. Imana ituyoboramo ‘ngo tuzane ubwiza maze dusakaze impumuro yo Kugira neza Kwayo.’ Ijambo ry’Imana ry’uyu munsi riragaruka ku biti, ntabwo ari ku ndabyo, ariko ubutumwa ni bumwe – shishira aho uri.
Ijambo ‘gushisha’ risobanuye ubuzima no gukura no kugira ubwiza. Ibitandukanye n’ibyo ni ‘ukurumba / kuraba’ kandi nta narimwe ibyo aribyo Imana yifuriza abana bayo. Niba Imana ishobora gutuma imigezi itemba mu butayu, mu by’ukuri inashoboye kugufasha gutohagirira mu busitani ubwo ari bwo bwose yahisemo kuguteramo. Ibanga rihishe mu gukomeza kubaho womatanye na Yo. (Yohana 15).
Gusenga: Mana Data, nshoboza gutohagirira aho Wanshyize muri iki gihe. Ndifuza guhesha icyubahiro izina ryawe. Amena.
Yanditswe na Sue Cronk, ishyirwa mu Kinyarwanda ikuwe mu nyigisho za buri munsi za Ellel Ministries International zitwa Seeds Of The Kingdom zo ku itariki ya 31 Nyakanga 2020.
IYANDIKISHE UJYE UBONA IZI NYIGISHO MURI EMAIL YAWE
