“Umuntu wese iyo ari muri Kristo aba ari icyaremwe gishya, ibya kera biba bishize”. 2Abakorinto 5:17
Nkiri umuhungu muto, nakundaga kugerageza kuvumbura ibyo abantu bashobora kuba bakiriye kuri Noheri. Wenda nkabona umuhungu utwaye igare rishya, umukobwa yishimye afite agapupe gashya, umusaza wambaye ingofero nshya, cyangwa umudamu ufite ibyo kwambara mu ntoki bimukingira imbeho bishya. Mu bisanzwe, byaragaragaraga, kuko abantu bakunda kwakira no gukoresha ibintu bishya kandi bishimira kumenyesha abandi ko bafite ikintu gishya.
Nibaza niba ariko bimeze no mu buzima bwacu bw’umwuka. Bibiliya ivuga ko, iyo twemeye Kristo nk’Umukiza wacu, tuvuka ubwa kabiri tugahinduka icyaremwe gishya. Umwuka wacu uba muzima ku Mana. Ese ubwo buzima bushya muri twe bugaragarira abandi nk’uko kwambara furari nshya nabonye kuri Noheri bimera? Ubu buzima bushya bukomeza kuba bushya kuko ubugingo buhoraho. Imibiri yacu irasaza, ariko umwuka wacu ntusaza. Rero, uko twaba dushaje kose, ibimenyetso by’ubuzima bushya bigomba kugaragara muri twe.
Mu myaka myinshi ishize, numvise ikiganiro cyerekana ibintu bitatu byerekana ubuzima bushya. Byari ibintu bitatu muri Bibiliya ku bantu bazuwe.
‘Kwifuza ibiryo’ ni gihamya y’ubuzima bushya mu nkuru yo kuzura mu bapfuye umukobwa wa Yayiro (Mariko 5: 21-43). Yesu yazuye uyu mukobwa hanyuma abwira ababyeyi be kumuha icyo kurya. Kwifuza kurya ni ikimenyetso ndakuka cy’ubuzima. Nigute twifuza ibintu by’Imana cyane cyane Ijambo ryayo?
‘Ubushake bwo gutanga ubuhamya’ ni gihamya ya kabiri y’ubuzima bushya. Igihe Yesu yazuraga umupfakazi w’umuhungu wa Naini, umuhungu yaricaye atangira kuvugana n’abari bamukikije (Luka 7:15). Mbega inkuru yari afite yo kuvuga, natwe niko biri!
Icya gatatu, inkuru ya Yesu azura Lazaro mu bapfuye itwibutsa ko, iyo twakiriye ubwo buzima bushya buva kuri Kristo, akenshi hariho ibintu biva mu buzima bwacu bwa kera bigira ingaruka ku rugendo rwacu na Yesu, kandi bigomba kuvaho (Yohana 11) . Dusoma ko, igihe Lazaro yavaga mu mva, yari agihambiriye imyenda yo mu mva. Yesu arababwira ati: “Mumurekure, mumureke agende.” Ibimenyetso byo kugira ubuzima bushya muri twe ni ugukuraho iyo myenda yo mu mva ishaje kugira ngo dushobore kwishimira imigisha yose y’ubwisanzure mu buzima bushya bwo gukurikira Yesu.
Mu gihe buri dukomeje urugendo rwacu n’Imana, twese, tubifashijwemo n’Umwuka Wera, tubashe kwerekana iyi mico ndetse n’indi y’ubuzima bushya, bugomba kuboneka muri Yesu.
Gusenga: Mwami, mfasha kugira ngo mbashe kwerekana ko mfite ubuzima bwawe bushya muri njye. Kubw’Umwuka wawe, umpe inzara nyayo y’ijambo ryawe, icyifuzo cyo kubwira abandi ibyawe hamwe n’urugendo rutabangamiwe n’imyenda ishaje yo mu mva. Amena.
Byanditswe na Malcolm Wood, ishyirwa mu Kinyarwanda ikuwe mu nyigisho za buri munsi za Ellel Ministries International zitwa Seeds Of The Kingdom zo ku itariki ya 20 Mutarama 2021
