“Nimushake Uwiteka bigishoboka ko abonwa, nimumwambaze akiri bugufi.” Yesaya 55:6
Hazaza umunsi n’igihe Yesu azagaruka. Nta kizewe nkabyo. Amasezerano yose yerekeye ukuza kwa Yesu kwa mbere yose yarasohoye ku murongo. Kandi hariho amasezerano menshi mu Byanditswe Byera ku byerekeye ukuza kwe kwa kabiri kuruta ayari ahari ku kwa mbere. Isi iramenyeshwa kandi uko iminsi igenda ishira tugenda twegera umunsi Yesu azagarukira nk’Umwami w’abami.
Nkuko tubona kandi twumva ibintu biteye ubwoba bigenda bigaragara muri iki gihe, abantu bahatirwa kubaza ibibazo bikomeye kubyerekeye ubuhanuzi Yesu yavuze ku byerekeye kugaruka kwe. Bamwe barimo gushakisha mu Byanditswe bashaka ibisubizo. Oya, ntabwo ngiye guhanura igihe, ariko bizashoboka.
Ndakwibutsa icyakora, akamaro k’Ibyanditswe byacu by’uyu munsi – igihe kirimo gushira! Niba tutazi Umwami ubwacu ku giti cyacu, noneho, nk’ibyihutirwa, hagarika ibyo ukora byose, wicishe bugufi imbere y’Umwami, Umuremyi w’isi n’ijuru, Se w’Umwami wacu Yesu Kristo hanyuma umusange ubu. Kandi, nk’uko Yohana abitubwira muri Yohana 1:12, “Abamwemeye bose bakizera Izina rye, yabahaye ubushobozi bwo kuba abana b’Imana.”
Nta n’umwe muri twe uzi umunsi cyangwa isaha Yesu azagarukira cyangwa umunsi cyangwa isaha y’igihe natwe ubwacu tugomba kwitegura guhura n’Umuremyi wacu. Ibiba ku isi ni umuhamagaro munini wo gukangura Umubiri wa Kristo. Ntutinde kwegera Umwami Umukiza wawe. Nubikora, agakiza karaza iwawe uyu munsi!
Gusenga: Urakoze Yesu, kubwo kwihutirwa kw’Ibyanditswe byera by’uyu munsi. Urakoze kunyibutsa ko muri wowe gusa ari ho hari agakiza n’imbabazi. Uyu munsi ndaje iwawe bundi bushya, natura icyaha cyanjye kandi ko nkeneye Umukiza, ndagutumiye ngo ube Umwami w’ubuzima bwanjye. Mu Izina rya Yesu. Amena.
Byanditswe na Peter Horrobin, ishyirwa mu Kinyarwanda ikuwe mu nyigisho za buri munsi za Ellel Ministries International zitwa Seeds Of The Kingdom zo ku itariki ya 01 Gashyantare 2021
