“Kandi tujye tuzirikana ubwacu kugira ngo duterane ishyaka ryo gukundana n’iry’imirimo myiza. Twe kwirengagiza guteranira hamwe nk’uko bamwe bajya bagira, ahubwo duhugurane kandi uko mubonye urya munsi wegera, mube ari ko murushaho kugenza mutyo.” Abaheburayo 10:24-25
Umunsi umwe mu gitondo cya kare, nanyuze mu murima w’intama hafi y’urugo rwanjye. Ryari ryaraye ari ijoro rikonje cyane, intama zari zegeranye zirunze mu nguni imwe y’umurima, bigaragara ko zashakaga uburyo bwo kwirinda no gushyushyanya. Natekereje ukuntu ibyo byari ubushishozi!
Muri iyi minsi yijimye kandi igoye, “nk’intama” z’Imana dukeneye kuba hamwe, kugira ngo tubone ihumure n’imbaraga biva kuri bagenzi bacu. N’ubwo tudashobora guhura ku mubiri kubera kutubuza kwa covid, ubu hariho inzira nyinshi dushobora kuvugana hagati yacu ako kanya- binyuze kuri telefone, amashusho, amajwi, porogaramu zohererezanya ubutumwa, imeri hamwe na Zoom. Mbega ukuntu bino bisubijemo imbaraga!
Umurongo w’uyu munsi uradushishikariza kureba uburyo dushobora guterana inkunga no gukomezanya. Nzi akamaro amagambo aziye igihe yangiriye mu bihe bimwe na bimwe, igihe Umwami yatumaga umuntu kuzana inkomezi igihe nari mbikeneye. Twese dushobora gukoreshwa muri ubu buryo kuri buri wese. Imigani 25:11 hagira hati: “Ijambo ryizihiye rivuzwe mu gihe gikwiriye, Ni nk’amatunda y’izahabu ku mbehe y’ifeza.” Amagambo yacu ashobora kubaka no kuzana ubuzima (Imigani 18:21). Kandi Imigani 16:24 haratubwira ngo: ” Amagambo anezeza ni nk’ubuki, Aryohera ubugingo bw’umuntu agakomeza ingingo ze“.
Aho gutegereza ko umuntu aguhamagara, kuki utasaba Uwiteka ngo akwereke ukeneye kumva ijambo rimukomeza uyu munsi? Ushobora gutangira gusengera uwo muntu ugasaba Imana kuguha ijambo ryihariye kuri we. Muri ubwo buryo, dushobora kuba igice cy’ingenzi cy’umubiri wa Yesu hano, tukazana ubwuzu no guhumurizanya, nk’izo ntama zo mu murima mw’ijoro rikonje!
Gusenga: Mwami, Mbabarira niba naribanze cyane ku byo nkeneye ubwanjye muri iki gihe. Nyemerera unyereke niba hari umuntu nshobora gutera umwete uyu munsi. Nyemerera unyereke uko nabasengera, kandi umpe ijambo ryo kubakomeza no kububaka. Mu izina rya Yesu, Amen.
Byanditswe na Jilly Lyon Taylor, ishyirwa mu Kinyarwanda ikuwe mu nyigisho za buri munsi za Ellel Ministries International zitwa Seeds Of The Kingdom zo ku itariki ya 15 Gashyantare 2021
