“Mureke amahoro ya Kristo atwarire mu mitima yanyu, ayo mwahamagariwe kuba umubiri umwe, kandi mugire imitima ishima.” Abakolosayi 3:15
Narimo nsoma igitabo kiza aho umwanditsi yavugaga ku rugendo rwe ava mu nyigisho z’Ikinyejana gishya (New Age) aho yari umutoza wa yoga, umwigisha wa Reiki ndetse yakoreshaga imitekerereze y’iki Budisite kugira ngo abone amahoro. Agitangira yabonye ‘amahoro’ menshi, ariko amuyobora mu nzira mbi yo gushakisha amahoro atari ay’ukuri yari yabonye. Ikibabaje, yabonye ibirenze ibyo yasabye, uko yakomezaga gukorana n’isi y’umwijima. Aho kugira ngo umutima n’ibitekerezo bye birindwe n’amahoro, ahubwo byakomeje kumwangiza. Isi y’’ikinyejana Gishya ishobora kuduha amahoro y’intuburano, ariko aya ntayobora ku buzima n’umundendezo.
Mbona hari ibintu bibiri bitandukanya gutekereza (meditation) bishingiye kuri Bibiliya no gutekereza bishingiye ku myizerere yo mu bihugu by’iburasirazuba ( icyanyuma gishingiye ku Kumenya ibyo utekereza (Mindfulness)) – Gutekereza bishingiye kuri Bibiliya bivuga ‘gutekereza ku kintu’. Kumenya ibyo utekereza bisobanura ‘kurekura ibitekerezo ugasiba n’imitekerereze’ akenshi ukabikora utumbiriye ikintu, nko guhumeka. Ibi imizi yabyo ishingiye ku myizerere y’abahindu n’Ababudisite.
Nk’abakristo dukeneye kwitondera imikorere y’iby’ikinyejana gishya birimo kwinjira mu nsengero. Yoga ishobora kugaragazwa nka ‘Yoga ya Gikristu’ ariko uburyo ikorwamo (uko binanuramo) ni ukuramya ibigirwamana bya Hindu, byizerwa nk’ibifungura imbaraga mu mubiri, zizwi nka chakras. Kumenya ibyo utekereza (Mindfulness) iri gukoreshwa mu nsengero aho kuri ubu ari umwitozo wa buri munsi abana bakora ku mashuri amwe n’amwe. Muri iki gihe hari ikitwa ‘Gukangukira gutekereza kuri Kristo’, ariko ni uguhindura kumenya ibyo utekereza (mindfulness) bayigira ‘iya gikirisitu’.
Ntabwo dukeneye kwigira ku yandi madini kugira ngo dukunde kandi twubahe Yesu cyangwa ngo twibwire Ijambo rye. Abafilipi 4:6-7 hadufasha kumenya uko dukwiriye gusenga no gutekereza. Handitswe ngo ‘Ntimukagire icyo mwiganyira, ahubwo ibyo mushaka byose bimenywe n’Imana mubisabiye, mubyingingiye, mushima. Nuko amahoro y’Imana ahebuje rwose ayo umuntu yamenya, azarindire imitima yanyu n’ibyo mwibwira muri Kristo Yesu.’ Mbega isezerano ryiza! Amahoro ye azarinda imitima n’ubwenge bwacu nyuma yo gusaba no kwinginga no gushima Umwami!
Umurongo wa 8 usobanura ibyo dukwiriye kwibwira: ‘Ibisigaye bene Data, iby’ukuri byose, ibyo kubahwa byose, ibyo gukiranuka byose, ibiboneye byose, iby’igikundiro byose n’ibishimwa byose, nihaba hariho ingeso nziza kandi hakabaho ishimwe abe ari byo mwibwira.’
Umurongo wa 9 uvuga ngo ‘… abe ari byo mukora [mu buzima bwa buri munsi]. Ni bwo Imana y’amahoro [yo soko y’amahoro] izabana namwe.’ Dukeneye kumureka WE akatubera isoko y’amahoro.
Gusenga: Mwami Mwiza, ndakwinginze umbabarire kuba ntahora ngushaka ngo umbere isoko y’amahoro. Mpisemo kwibwira ibyawe ndetse n’ijambo ryawe. Urakoze kubw’amahoro yawe arinda imitima n’ubwenge bwacu. Umfashe gukomeza kugutumbira. Mu Izina rya Yesu. Amena.
Byanditswe na Gilly Mathiesen, ishyirwa mu Kinyarwanda ikuwe mu nyigisho za buri munsi za Ellel Ministries International zitwa Seeds Of The Kingdom zo ku itariki ya 26 Mata 2021.
